2015年6月24日星期三

放假有時間就是任性

理財不代表孤寒,不代表要犠牲生活的質素。懂得理財只是代表利用金錢時,更加進退有序,更加善用金錢。賺十蚊的話,唔會用十一蚊。賺十蚊,我適度用九蚊,儲起一蚊。其實都只是差兩蚊的分別,但處境已經可以很不一樣。,一個是令自己往後進退維谷,惶惶不可終日;一個是令自己安泰自若,睡得安,訓得穩。

-----------------------------------------------------

極少為左食野而去排隊。平時一見到要排隊的餐廳調頭就走了。個人認為,大部份時間食野,只是為醫肚而已,無可能餐餐都去享受。排隊為醫肚簡直是浪費時間。為飽肚,去大家樂食都係一樣。連大家樂都人多。咪買個麵包食。總之,平時一定唔會排隊去食野。

之前睇到報紙介紹,中村籐吉,俾佢的綠茶紅豆所吸引。不過聽說,九點半就要去排隊。今日秉承著假期間,有時間就要任性的精神,就特登去排隊一嘗口腹之欲。食的方面,為享受,還是為醫肚,我還是分得清清楚楚。

原先想平日(星期二)去食,應該不會那麼多人。誰知一樣咁多人。十點三去到已經有幾十人在排隊。看來應該是真的很好吃。期望隨著排隊的時間自然提高。

排隊中,八八卦卦,聽到身後的幾個女仔對話,原來她們是特意請假排隊來食甜品。現在的後生仔女對食的追求,還真不是我能理解得到。原以為這些為食好野請假的故事,只是報紙嘩眾取竉的技倆。親身聽過,才知道所言非虛,又大開眼界了。

排了兩個鐘,終於可以入坐。原諒我事前沒有做資料搜集。此時才從店員口中得知只可以食九十分鐘。心中裡想,不是吧,我食野的時間還比不上排隊的時間。 排隊排了兩個鐘,食就只有九十分鐘時間食。一氣之下,理性已經不在存在。把心一橫只想有幾多試幾多。反正不會再來了。一口氣就叫左餐單上一半的東西,十足土豪上身,連價錢都不看了。除了一杯唔知係咪飲左識飛的細茶要價$198,興幸在最後的一絲理性把關下,還是沒有要。不然用 $198 飲杯茶,事後必定會揼心口揼到腫。

與朋友傾下講下又食下,九十分鐘是絕對不夠的。最後的一杯甜品,要在十分鐘之內完成。實有些少牛啃牡丹的感覺。加上其時已經飽到上心口,與其說是享受,不如說是活受罪。吃東西吃到這樣,是我最為討厭。

最後,更發覺最後這杯甜品,其實已經包含之前所食的大部份東西。雪糕,有。蛋糕,有。紅豆,有。丸子,有。啫喱,有。叫一杯其實已經足夠有餘,根本不用叫其他。一種中伏的感覺由然而生,實非筆墨所能形容。

平心而論,出品還算上乘。綠茶雪糕,尚能做到齒頰留香。紅豆蓉足夠細滑。遺憾是沒有時間,仔細去品嚐當中的味道。環境也不錯,能遠眺維港,感受香港之繁華。但排隊加上限時,已經令期望值過高。變相即使出品再好,也有一絲失望的感覺。正是期望越大,失望越大。

偶以為之尚可,此風實不可長。

可一不可再。

特此一記。



P.S. 食店來說,我還是覺得大家樂最好。價錢又平,質素又穩定,出餐又快,又知道食咩,又唔會中伏,又唔會俾人趕,又可以坐幾耐都得 (下刪數萬字) ………… 最愛還是大家樂!只是身邊的人都不太認同此觀點。(笑)

28 則留言:

  1. 我都覺得大家樂就夠喎

    回覆刪除
  2. 此留言已被作者移除。

    回覆刪除
  3. 此留言已被作者移除。

    回覆刪除
  4. 198一杯茶,太誇張了。

    回覆刪除
    回覆
    1. 還好沒有失去理性,不然就後悔死了。lol

      刪除
  5. 回覆
    1. Tom兄,真乃知音。大家樂焗豬真的是一絕~~ 講起已經想食,哈哈

      刪除
  6. 回覆
    1. 股票上大快活看似更好,大家樂估值不低。當然兩者其實都不錯。

      刪除
  7. 其實有好多食店價錢同大家樂差唔多, 但係食物唔錯, 亦唔洗等位, 「性價比」仲高過大家樂。

    回覆刪除
    回覆
    1. 的確,但大家樂夠普及,通街都有,唔洗煩。

      刪除
  8. 無食大家樂好耐,因為大快活好得多。

    回覆刪除
    回覆
    1. 兩者都好,只是大快活沒有特別喜歡的菜色。

      刪除
  9. 大家樂都ok,但我更愛老麥。

    回覆刪除
    回覆
    1. 老麥在英國吃得太多,吃到怕了 :(

      刪除
  10. 若一定要出街食同香港大集團既話我鐘意去太興, 大快活, 八方雲集, 殺利亞(限時90分鐘), 爭鮮(限時40-50分鐘), 稻香等等.

    雖則知到人地做生意有風險諗爆頭兼租貴人工貴食材貴, 但排兩個鐘食九十分鐘$198杯茶真不是我杯茶, 試一次都嚴多呀! :D

    回覆刪除
    回覆
    1. 在香港的確有很多又平又快又靚的餐廳,謝謝自由兄的提議。八方雲集之前也未試過,找機會要試試看。

      $198一杯綠茶真係唔知有咩咁好飲,飲左又唔會飛天。還是去好的酒樓,嘆杯鐵觀音算數。十數元任飲。

      刪除
  11. 我唔鐘意大家樂!










    我鐘意大快活!!!!!!

    回覆刪除
    回覆
    1. 哈哈,看來這裡有不少大快活的粉絲呢。大快活我比較喜歡它的股票呢~

      刪除
  12. 上次講漏了一位星味十足的Blog 主'巴黎'. Sorry.又少許不同意禪師所說的一次也嫌多的說法,
    箇中的原因,相信聰明的讀者也會明白. 大家像講漏了'美心'.其實這三間飲食集團,各有捧場客.經歷那麼多年風浪,仍屹立不倒,實屬難得. 自己友

    回覆刪除
    回覆
    1. 不是你提起的確忘了美心。純以美心mx,大家樂及大快活論,美心mx 的分店的確少了一點。忘記了也不出奇。還是多得自己友兄心水清呢。

      刪除
  13. 你好,我是harry,都係90後,我係暑假做左3個月暑期工(去到8月個陣就3個月),但係我問左hsbc,東亞同中銀,一個話要一百萬係戶口先得,一個又話要做半年工作,一個又話要27萬年資,咁我三個都做唔到,可以點算?
    同埋我諗住8月尾到9月頭去英國睇樓同買樓,你會唔會同我一齊去@@
    thanks

    回覆刪除
    回覆
    1. Hi Harry,這是沒有辦法。以你的情況,想買英國樓就只有 full pay 一途了。但還是那句,隔山買牛有風險,要小心小心小心。

      刪除
  14. 你好你好 我係NATALIE 我係LONDON讀書,想係英國倫敦買樓。我心意既單位星期6睇 星期1早上就比人make 左OFFER,但我再睇又睇岩都唔知點好。我想問如果找律師/估價師邊到搵比較好?THANKS!!!!

    回覆刪除
    回覆
    1. Hi Natalie, 我的建議是你繼續不停去睇,俾人捷足先登是很正常的情況。

      刪除

Related Posts Plugin for WordPress, Blogger...