一係威威, 一係攬女, 一係工作打拼

上一篇 <乞丐的故事> 中，七十後兄留了一個很值得思考的留言：

"後生仔, 一係威威, 一係攬女, 一係工作打拼. 

咁快想做乞衣做襌師做食訓加菲貓, 似乎唔係好襯年紀. 

到好似有人年老時, 午夜夢迴, 撫心自問, 一生過成咁. 可能有點浪費. 

 人一世物一世, 乜都試下啦. 

 英國物業仲有得升, 會否買架BEN 跑番大學威一威?" 

本來已經覆了，不過激發了思考，索性另外出文。

先解釋一下，上一篇並不是說要做乞丐。只係我認為人最重要的是搵到一個適合自己的平衡點。並唔係話一定要做到乞丐成日唔做野，或者有錢人一樣由朝做到晚。當然每個人在聽完故事後都有自己的理解。

再講一講，七十後兄說要在後生做的事情。

老實講，頭兩樣我真的不太感興趣。

要威威，揸架法拉利返學，俾人投以羨慕的眼光？！

我認為再威再得戚又點，都係一殺那的事，都係做俾人睇姐，自己又唔會生多塊肉。與其將心思放在諗點威之上，不如將心思放在自己想做的事上仲好。

況且，就我到目前所見，我覺得威的人，他們都不用刻意做出來。他們的威是來自他們的學識，修養同性格，真正令人佩服。要裝出來的威，那只是土豪式的威，這種威要不要也罷。

"人一世，物一世，咩都要試下。"

我其實好反感呢一句，覺得呢句真係害死好多人。

人一世，物一世，毒品試下先。。。。
人一世，物一世，去左旅行先。。。。
人一世，物一世，買埋呢樣先。。。。
人一世，物一世，享受左先算。。。。
人一世，物一世，賭埋呢局先。。。。

講攬女，

鬼妹，日本妹，港女，韓妹，台妹，泰妹。。。。
清純，狂野，小家碧玉，大姐姐，小妹妹。。。。

要試邊到邊得晒。所謂學海無涯，慾望又何嘗不是無涯，要試既試得幾多。

對我來講，啱既，一個就夠晒數。找到個適合的人就可以。

根本無謂去追太多。生命有限，以有限去追無限，我覺得就係太蠢。

平凡是否就不好呢？

我覺得未必，平凡過活也可以是一種幸福。

全都是每個人自己的選擇，有得必定有失。

有些人想過平淡的，有些人想過刺激的。

你叫一個想過平淡的去過刺激的生活，對他來說是一種痛苦，相反亦然。

過了一輩子平淡，或許有一天真的會覺得咁就過左一生。

但一輩子見盡風浪，會不會最後又期盼可以平平淡淡，從不經歷這些風浪呢？！

做到胡雪巖般，威又威過，女又攬過，做又做過。到頭來，都是得不到平凡的快樂。

有首歌的歌詞，我覺得寫得幾好：

"在我得到整個宇宙以後，突然懷念你。。。"

乞丐的故事

真實故事改編

話說有一日有錢人在返工嘅途中佢遇到一個正在向途人乞錢的乞丐。

於是有錢人就同乞丐講，不如你同我打工，我糧畀你。你就唔再需要在街上日曬雨淋。

乞丐同有錢人講，我點解要返工？點解要搵錢？

有錢人話：有錢可以買好嘅嘢食住好啲瞓好啲。

乞丐就說：一個人食幾多著得幾多得幾多。食不過三餐，睡不過一覺。住得更好食得更好瞓得更好都係一瞬間嘅事情。畀你食鮑參翅肚，之後都係疴返出來。跟吃乞食回來的東西的，結果都沒有分別。唯一嘅分別只不過係食得舒服一些。不過你就肯定你食得真係舒服？！

乞討續說：我吃東西的時候，無憂無慮，我可以專心品嚐食物的味道。乞到多些的時候，食好一點，感受好的味道；乞得少的時候，就吃差一點知道差的味道。但係我睇有錢人你，食野的時候，都要忙著去諗點樣去管理公司，點樣去解決問題，有著無盡嘅煩惱，根本就冇可能好好咁品嘗食物本身嘅味道。那即使你食得更好又有咩意思呢！

不錯，你或者可以因為搵錢而可以過上你認為更舒適的生活，但事實上係咪真係更舒適呢？！

喺搵錢嘅途中你所帶來的壓力煩惱憂慮，以及所犠牲的，是否真的值得呢？

雖然我食得冇咁好，瞓得冇咁好，但這種方式的生活，至少是自由自在無憂無慮。你所追求的不也是這樣嗎？

有錢人聽到之後認真去反思自己過緊既生活，雖然自己揸靚車住靚樓，但係無時無刻都要不斷去俾各種嘅壓力及工作。揸車的時候要不斷講電話，也根本冇時間享受揸車嘅樂趣，有靚車跟無靚車一樣；每晚深夜返屋企既時候，只是在床上睡一睡，之後第二朝一早就要返工，連認真睇間屋的時間也沒有，更惶論辦去陪家人，

於是係聽完這個乞丐的說話之後，有錢人從此就開始慢慢放下腳步。

－－－－－－－－－－－－－－－－－－－－－－－－

每次跟人分享這個故事，都會得到有趣的回應。

有些人如有錢人般，開始反思生活。

有些人會說教壞細路，令人失去上進的心。

我就認為，最重要的還是在中間取得平衡，在慾望和生活中間。

乞丐固然是一個極端，但有錢人又何嘗不是另一個極端。