2015年3月6日星期五

以利是錢教小朋友理財

昨日是正月十五,對小朋友來說,相信最過癮的莫過於是拆利是。

當仲係小朋友的時候,老媽子也會跟傳統,要在十五先可以拆新年逗到的利是。不過現在呢,收到利是之後,轉個頭就拆左了。一來在英國收得少,得幾封,不會有好像之前幾十封利是一次過拆咁過癮,二來過左初三已經無人會派利是,唔似在香港,整個新年初一至十五都可以收到利是,落街搭電梯都可以收到鄰居的利是,所以更加無謂等到十五先拆。

見到網上很多人都教路如何透過儲起小朋友的利是錢,為小朋友的未來儲起一筆錢,又或者利用這筆利是錢去培養小朋友的理財技能。老實說,我很羨慕你們從小為小朋友儲起利是錢,讓他們將來有筆錢,我老媽就從來無這樣做過,細個的時候利是錢從來都未真正到過我手。

如果各位有睇到我的[股票,我細細個就買始買]系列,我第一次可以自由分配利是錢要由中一才開始,從那之後,利是錢都是用來買股票。而在中一之前全部的利是錢,都要被老媽子充公國庫。老媽子充公利是錢入國庫的理由是,新年期間佢派利是都派唔少錢,無佢派利是,做細的我都無利是收。大人派利是,細路仔收利是。除非是長輩,否則兩家人互派利是。對家的父母派給我們,老媽又封利是俾對家的細路仔,其實以兩個家庭來講都係個零和遊戲。所以除左阿嫲,阿爸同阿媽果封,其他的利是都要收入國庫,幫補佢的荷包咁話。不過阿嫲同阿爸阿媽三封利雖然唔洗收入國庫,但其實都要上繳入阿媽的荷包,美其名,儲住先,等遲下再用。遲到幾時?總之就遲下啦!結果,還是一分一毫都無入過袋。

雖然羨慕家長們咁早就為小朋友的理財技能籌謀,但又很坦白說,作為一個比家長們更接近童年,都仲算係小朋友的後生仔,我覺得家長們這樣做多少有些一廂情願。在小朋友的腦海中,通常都只係得玩,玩,玩。一個小朋友又點會同你咁好氣講理財,大人都唔係個個肯講。

現在回頭看,我反而覺得老媽子將所有利是錢撥歸國庫,比起幫我儲起一部份,又或者俾一部份來用,對我的理財發展更加有用。雖然初頭唔明白,都幾憎阿媽將辛辛苦苦逗的利是錢,一下子就全部被充公,只係得拆利是的一刻可以稍為接觸一下睇得唔用得的銀紙。

利是錢對一個小朋友來講真係好多的錢,特別是入世未深的細路。細路仔通常都唔洗點用錢,最多就係用來買零食,講緊都係兩三蚊。很少要用到過百蚊,過千蚊直情無機會,要用咁多錢的話,通常都係大人俾,幾時論到小朋友。換言之,逗利是得來的幾千蚊,甚至上萬蚊,對於一個細路仔來講,已經係好多好多好多的錢。

細路仔多數只有兩樣野要用錢,一係買玩具,一係買零食。完全由小朋友自決利是錢的用法,基本上同叫佢買晒做玩具零食無分別。佢唔會學到要珍惜用錢。好易會令佢地以為錢是從天而降,叫兩聲恭喜發財就有。所以完全由小朋友自決,對小朋友根本係有害無益。

儲起一部份又如何?回去個三封 "阿媽儲住先" 的利是,那裡都有千幾蚊。初初在新年之後見到想買的玩具,都會叫阿媽用住 "儲起" 的利是錢來買,但總是被阿媽話要儲多陣,所以都係買唔到。或者唔係個個父母會學我阿媽咁古惑,將筆名義為 "儲起" ,實質納入國庫。有些父母會真心為小朋友儲起,但既然係幫小朋友儲起未來用,我估都唔係儲一兩年咁簡單,而係打算儲到小朋友長大成人。但對於一個小朋友來說,實在很難明白這遍苦心。小朋友的目光幾時會有咁長遠,望到去大個的時候。現在很多大人都做唔到,更何況係小朋友。小朋友的很簡單邏輯,買唔到玩具既就係衰人,更何況筆錢係小朋友 "自己" 的。我當時只會恨我阿媽,點解明明係我的錢都唔可以買玩具。"筆錢要用在未來需要的時候",這些大道理見鬼去吧!我現在就很需要筆錢去買玩具!!

或者,將小朋友的利是錢真的儲起,然後讓他們遲下買玩具,會不會更好呢?這樣至少可以令他們學會儲蓄的重要性。呢個邏輯聽得好多,但我覺得咁同小朋友完全自決利是錢沒有甚麼分別。有幾多個小朋友會有耐性等一年半載,然後先去買玩具。用呢個方法,筆利是錢最多咪就係儲到下次去玩具反斗城的時間!

被阿媽無情的拒絕幾次之後,都知道咩事,知道筆錢其實都係上繳了國庫,一輩子都唔會再見到。深深明白到與利是錢無緣,即使利是錢對細個的我來說是幾咁多,其實都與我無關。反而這樣,我先更加珍惜每日一個幾毫的零用錢。遇到想買的玩具,會慢慢去將零用錢儲起。識得去衡量買甚麼東西,我究竟係要日日買零食,還是到月尾買高達模型。可以說,最基本的理財功夫,就在這個時候打下。所以我現在覺得,阿媽當年將所有的利是錢收歸國庫,其實都係唔錯的做法。

當然,跟大家分享,只係供大家作個參考。看看我老媽子的做法,同呢個做法對一個小朋友往後發展的影響。小朋友的時候或者唔明白,但到現在明白了。學我阿媽所講,養大一個細路你估唔洗錢呀。那些新年錢,其實老媽子一早就已經還清了,而且還要連本帶利還多了很多倍呢!最重要的係,一家人其實真係無得計較咁多。



2 則留言:

  1. 塘人呢個年紀已經有出無入, 所以Ricky趁後生逗得就逗啦:D

    回覆刪除
    回覆
    1. 呢幾年逗利是都只係得兩三封, 叫做好過無咁解 :(

      刪除

Related Posts Plugin for WordPress, Blogger...