2012年1月28日星期六

仲有一個大地主

  講番地產霸權,除左誠哥同郭家的旗艦長實同新地可以分享地產霸權的好處外,其實我認為仲有一個大地主可以,佢就係-領匯(0823)


  眾所周知,作為一隻REITS,領匯的主要收租資產就係遍佈全港的屋村商場,按領匯的宣傳片講就有四成香港人都係潛在捧場客,表面睇領匯已經吸引。


  買收租佬除左要睇最基本的負債外,仲有四件樣要睇同要諗:出租率,租值,穩定和回報率。


  先講出租率同租值,由領匯上市至今都維持係~90%左右,十鋪一"吉",相對其他Reits來講相對較低,不過數字未必等於事實,因為翻新中的商場同街市拖累了穩定商場的出租率,若以穩定商場的出租率來計,領匯的出租率就達到95%,同其他Reits差不多。


  至於租值,領匯自上市之後就沒有一年不加租,呎租由07年的$23。6到11年的$32。8。領匯係07同08兩年金融海潚期間租值都仲有得升,雖然俾人媽媽聲,但亦可看出領匯驚人的加租能力。未來領匯會繼續翻新更多的商場,看來租值係未來會繼續升上去。


  穩定,領匯街坊客雖然多,但消費力不高。其十大租客入面唔見有一間奢侈品公司,全部都係提供普通生活所需的公司如:屈臣氏,大家樂,麥記等,可見領匯的商場完全吸引唔到肯俾貴租的租客,不過這些租客有樣好,就係勝在夠穩定。拿我香港屋企附近的百佳做例子,間百佳的位置自我懂事已來咁多年都未搬過,至少十幾年都係同一位置,正宗的十年如一日,只係最近仲變大左做埋超級廣場。


  最後要講的一點,回報率,領匯現在的股息率只有3。89,相對其他的reits動輒六厘明顯較低。不過,考慮到領匯未來的發展加上可能收購其他商場,領匯目前的價格我都仲可以接受。

2012年1月21日星期六

不要長實,要新地?

  繼上篇有關地產霸權的想法後決定買入新地(0016)。


  同是地產霸權,點解唔買我偶像李超人的長實呢?我的睇法係長實同新地都係很好的公司,但奈何長實的業務太多太雜,石油, 電訊 ,港口,零售......幾乎所有同生活有關的商業活動都可以找到長和系的影子。雖然我對長實的歷史很感興趣,那香港站上蓋置地同長實之爭,收購和黃,Orange的收放......都令我深深入迷,但以我的投資角來看,這種綜合型企業我是沒有太大興趣。




  一來,我不太喜歡長實的一些業務,如:電訊,石油,零售。電訊業務這類科技主導的行業今日唔知聽日時,每有新的科技電訊業都會受到影響,拿最近的whatsapp為例,whatsapp的出現就已經令到短訊的收發量係今年首次錄得倒退了。石油同零售這類受經濟週期影響較大的行業都唔係我的心水。況且要買石油不如買中石油,或者係英國買Shell也可以;買零售都有很多選擇,總之就唔洗買長實。二來,長實的世界佈局當中的英國公用部份同我的組合有所重疊,我就係唔想太過偏重英國公用股先想買香港地產股。現在我買長實的話我為何不繼續買英國公用股呢?


  相反,新地的其他業務同主業的關聯性較大,關聯性唔大的業務佔的比重也不大,甚至可以無視。最重要的係新地近年來租金收入佔的比重越來越大,已經差不多佔基本利潤的一半。憑住這些現金牛,相信就算未來有甚麼黑天鵝也好,對新地的影響會較少。最重要的當然係這些金牛可以保證新地係未來有足夠的派息能力。

2012年1月17日星期二

買入中國銀行

  有錢就買股票,雖然中國銀行近來已經升了很多,但我認為有5厘以上及個位數PE的中國銀行都仲係平,今日繼續買入2000股@$3.27。因為用左原定月尾供的$1000新地,月尾只可改為$2000供新地。

2012年1月11日星期三

買入SSE及中國銀行

  英國方面今日買入50股SSE@ £12.66,唔知係唔係因為今日EDF(英國的六大能源供應商之一)下調天然氣價格5%,市場怕SSE跟隨下調,所以SSE一開市跌差不多3%呢?


  但我認為之所以會下調係因為之前加得太多,現在只不過係減番少少,符合番利潤管制協議所批准的利潤,換句話說,就係班吸血鬼之前計錯數,賺多左,現在唯有係往後賺少些,平衡番盤數。老實說,有利潤管制協議這必賺令牌,真係唔怕佢地冇錢賺。不過跌下都好,唔係我點用較用較平的價錢買金豬呢?!




  另外,利用香港政府派的6000大元中的一半買入1000股中國銀行(3988)@ $3.00,剩下的一半會以月供的方式買入新地(16)。

2012年1月8日星期日

與地產霸權同行?

  正當我苦思香港政府派的六千蚊,澳門派的七千用來買咩股票好的時候,"地產霸權"呢四隻字忽然係我的腦海中浮現。


  
 
  地產霸權,這詞出自前年書展內的一本書"地產霸權",意即香港的一班地產商壟斷及操控了香港市民的衣,食,住,行。地產商不單止經營地產主業,還有其他各式各樣的行業,包括交通,電力,煤氣,港口,超市......等等,係香港生活就好似同班地產商打工一樣。正正因為地產商幾乎賺盡了港人的一分一毫,好似吸血鬼一樣,所以近年很多示威的主題都同地產霸權有關。總而言之,地產商就係魔鬼,最好就係將他們打倒,至少這是那班很激進的示威人仕所認為。




 但換個角度睇,就係全香港都非常認同這班地產商都係好好搵,同埋要改變這個情況亦都好難。如果易改變就唔會示威咁多年,李嘉誠先生就唔會到今時今日都仲係香港首富。二來佢地已經壟斷了香港主要的行業,新的玩家想進入市場都冇地方發展。地產商所經營的業務又不停地他們印銀紙,係投資來講就係有穩定的現金流。穩定的現金流加上不易轉變的business model,這班地產商其實都係不錯的公司!



  學我大伯話,香港人最叻唔係勤力,牛都好勤力,但你唔會話隻牛好成功;香港人最叻的係識轉彎,做事有彈性,條路唔通就諗過第二條,仲有一條通。既然這班地產商打不倒係鐵一般的事實,何不接受現實呢?現實係既然地產商打不倒,那就不如加入佢地,況且用政府的錢來與地產霸權同行也好像不錯,零成本,冇壓力!


Related Posts Plugin for WordPress, Blogger...