2015年5月21日星期四

萬五元月薪儲三千可上車

呢幾日睇新聞,睇到華置劉鳴煒的一番儲錢理論。要買樓的年青人,就要犠牲一些生活質素去少啲旅行,睇少啲戲,來加快儲錢的速度。

「當一個人是萬五元月薪,你如果現在『洗盡晒』或者只剩下一千元,你願不願意作出一些犧牲,『睇少啲戲』,『去少啲日本』。」

不過網民的反應就好一面倒,認為他這番說話極為離地。既因為他富二代的身份,而且認為儲多少少根本不會有影響到結果。儲五百,或者儲三千都係買唔到樓。網上就有幅圖惡搞來表示,即使每月儲三千蚊,也要儲足五十四年先買到華置旗下的樓!



但我就唔係咁睇。這些負面的留言,是忽略了背後的道理。我覺得呢番說話,重要的不是數字,而是這番說話背後的道理。其實每件事都只係從負面的角度去看有咩用?!

理財之道不外乎就是開源節流。開源不到,節流就是唯一方法。節流越多,剩下來的就越多。其實是好顯淺的道理,同阿媽係女人差不多。想儲錢當然要有所犠牲。無可能既不犠牲,又可以儲到錢。儲錢本來的原意就是將現在的消費儲起,在未來才花費。

即使以數字來講,每年可以儲多三千,一年三萬六,其實都無壞姐。難道有人會嫌錢腥,覺得戶口有錢是罪?!錢其實都唔係一定要買樓,仲有好多其他用途。難保有一天,你就是需要這三萬六。創業,投資,家人需要等等等等,樣樣都可能用到。可唔可以捕捉機會,好多時勝負往往就是這少少的積蓄所決定。

其實睇開我買樓故事的看官都知道,我都係靠祖蔭先買到樓的。不過亦正正係過去幾年的經歷告訴我,即使有祖蔭,自己多儲錢都是好的。

姐係咁,有層靚樓業主叫價一百萬。你父母可以幫你出九十七萬,你差三萬先買得到,叫業主可唔可以收平少少。另一廂有人就直接出一百萬。你估下業主會賣俾邊個?!三萬幾蚊或者唔多,但要用起上來有就係有,無就係無。唔好睇少呢少少的錢,有時候少少已經足夠決定改變你的一生。到時輸左個機會,你後悔無儲到那三萬六就已經太遲,後悔都無用。

19 則留言:

  1. 非常認同, 樓主年紀輕輕已經實踐遠大投資計劃, 配服! 但願我後生十年!

    Tom Kan

    回覆刪除
  2. 香港而家好政治化,特別以佢富二代身份去講呢啲說話,而且所講的數字又脫離現實,難免比人不食人間煙火的感覺。

    kenny

    回覆刪除
    回覆
    1. 我覺得數字上還可以,剛剛畢業係咁上下又唔算係差得太遠。我認識的不少人都係同佢講的差唔多,萬幾蚊人工,但成日去旅行之類。其實消費少一點,儲多一點錢都係好的。不過忠言逆耳,無論邊個講都係唔會啱聽。

      刪除
  3. 簡單講,香港依家係因人廢言,某種人有原罪,或者話,某種道理必勝
    對住呢啲人,其實唔需要講任何嘢

    回覆刪除
    回覆
    1. 參考下其他人的意見都無壞,固執最後傷害的始終係自己。

      刪除
  4. 全世界熱衷消費,對我黎講唔係咩壞事。反而全世界都儲錢我先驚...

    回覆刪除
    回覆
    1. 哈哈,都係既。要消費就由得他們,個個人唔儲錢做消費奴隸,又會少啲人爭資產,咁樣仲好。

      刪除
  5. 望到這類新聞, 估計會出現負面情緒的有三類人:

    1. 屋企人無錢俾佢, 自己又點都唔會儲錢買樓的人
    2. 自己要儲緊錢買樓, 但又覺得儲得很委屈的人
    3. 一向都眼紅身邊有買左樓的親朋

    一句到尾, 唔抵得o者, 其實係無罪o既

    回覆刪除
    回覆
    1. 的確係咁,但唔抵得又有咩用呢,倒不如學習一下其他人。

      刪除
  6. 有一個比喻係咁樣既...

    雞會生蛋,又會拉屎...

    看到好東西的人會搵到雞蛋,看到壞東西的人只找到雞屎。

    但最重要的是... 人們用什麼角度看事物是自己選擇的。而人們都必須對自己的選擇負責任。

    回覆刪除
    回覆
    1. 羅渣兄的這個比喻很好,受教了。 :)

      從多角度思考總是好的,好像這件事一樣,從負面的角度看只會有負面的情緒。從正面看又會看到不同的東西。

      刪除
  7. 此留言已被作者移除。

    回覆刪除
  8. 正面、負面,高下立見。

    回覆刪除
    回覆
    1. 負面學不到東西,又不會令任何人開心,何不用以正面態度面對。

      刪除
  9. 要買得起樓,同時又要過享樂的生活,魚與熊掌,不能兼得吧!

    回覆刪除
  10. 係心態問題,你有心做,就算筆錢買唔到樓,都可以用來投資,只要有心,你肯踏出一步步,都會有收穫,即使唔係物質上的

    回覆刪除
    回覆
    1. 對,有錢唔一定要買樓,還可以用來作其他投資。踏出第一步始終最重要。

      刪除

Related Posts Plugin for WordPress, Blogger...